Gammel

Ik vule me zo gammel as de mieter. Et begon een weke leden mit een dreuge hoest en now bin ‘k dikke en dikke verkolen. De ogen staon me zeer in ’t heufd, ik bin snotterig, hoesterig en proesterig, hebbe wat verhoging, de kop zit me verstopt… Dat soort dingen. En ik hebbe echt nargens nocht an, dat ik hebbe de hiele dag mar wat ommehongen. Veur de wissighied he’k gister even een sneltest daon, mar et is gien corona. Veur corona ha’k dit gedoe wel een peer keer in et jaor. Tiedens corona he’k et nooit had. Doe hul ik 99,9 percent van de meensken op aanderhalve meter bi’j me uut de buurt. En now is et weer mis. Et is vermoedelik kommen doe ‘k mit vierhonderd man in sporthal De Steense was tiedens et Oranjekonsert. Dit moet dus gewoon tied hebben, mar ik argere me wild. Ik hebbe alvast een peer dingen ofzegd. Gien daggien vot ankem weke en ik hebbe de fotosessie ok ofzegd. D’r moet altied nog een petret van me maekt wodden omda’k goed een jaor leden ereburger van de gemiente wodden bin. Vleden jaor is d’r wel een hiele trits foto’s maekt, mar de gemiente wil et toch nog wat aanders hebben. En ja, doe kwammen de burn out-klaachten. Doe ha’k d’r wel an. En now zol et eindelik wezen en hewwe dit gesodemieter. Ik zal gewoon ofwaachten moeten wanneer a’k weer wat fitter bin. Desnoods moe’k meer dingen ofzeggen. Ik marke vanzels ok hiel goed da’k de jongste niet meer bin.