Gammel

Ik bin now toch wel gammel an et wodden. Ik hebbe vandemorgen gauw wat hoestdraank in huus haeld en ik zal zodaolik stomen boven hiet waeter mit zoolt. Ik hadde een volle agenda en zol mooie dingen doen, mar dat wodt dus niks. Et wo’n ienzeme daegen, want vanof vandaege zeg ik alles of. Ik moet meensken ok niet besmetten. Ik bin vandemorgen dus niet naor fysiosport west. Ik hope da’k d’r op 9 jannewaori weer henne kan. Vandemiddag ha’k in Wolvege op vesite zuld bi’j Reindert en Tjitske. Mit Reindert zat ik vroeger op ‘e grote passenielszael van de belastinginspektie in Oenema Staote in Et Vene. De vesite hewwe verscheuven naor jannewaori.

De OSON is opheven. Jaoren leden gongen een protte meensken bi’j de ANBO weg omdat ze zovule geld ofdregen mossen an die laandelike klub. Zodoende wodden d’r plaetselike verienings veur oolderen opricht. De OSON was zoe’n verieninge veur Berkoop en Ni’jhooltpae. Ik was eerst ok lid van de ANBO en laeter dus van de OSON. En now bestaot die dus niet meer. Et geld is verpat en we kregen allegeer een mooie beker, een balle veur in de kastboom en een kleine rollade. Et wodde vandemiddag deur Aukje an de deure brocht. Zo gaot et…