Galle

Ik bin vandaege op weg naor de Eupen Stal bi’j de Kuunder langesfietst naor Berkoop toe. Een hoeke laand an de Meulereed was krek mi’jd, dat daor kuierden zes mooie sturken. Prachtige voegels, mar aarme moesies, kikkerties en slakkies… Zokrek naor huus toe bin ‘k over De Hoeve en Hooltpae gaon. Zodoende he’k vandaege toch ok nog 26 kilemeter fietst.

Et was weer een drokke dag in Berkoop. Ik hebbe veur 50 centen minder verkocht as gister. Dat gaot dus de verkeerde kaant op. Netuurlik he’k docht an de twiede dag van de Eupen Stal van vleden jaor. Doe wodde ‘k op die eerste zundag zo belabberd mit piene in de rogge en zo. Thuus bin ‘k doe drekt op bedde gaon, mar et bekwam hielemaole niet. Doe ‘k laeter op ‘e aovend ok nog spi’jen mos, he’k de dokterswaacht beld en doe bin ‘k naachs nog mit de ziekenauto naor et ziekenhuus gaon. De galblaoze mos d’r uut. Daor kan ‘k dit jaor in ieder geval gien last meer van kriegen. Butendat kan ‘k in kollums over de kultuurdippeteerde van de BBB mien galle nog prima spi’jen. D’r is trouwens goed angeven wat ik in Berkoop doe. Zie hieronder.