Johan Veenstra
Stellingwarver schriever en verteller

Gaanzen

Plaetst op 12 december 2023.

Doe ‘k gisteraovend deur et dörp leup om kast- en ni’jjaorskaorten her en der in de busse te gooien, heurde ‘k weer gakkende gaanzen overvliegen. Dat heur ik de laeste tied vaeke. Ik vien dat et mooiste netuurgeluud. Et klinkt zo mankeliek en dat past bi’j de tied van et jaor. Et bin de grauwe anzeggers van et verglieden van de tied. D’r is al weer haost een jaor veurbi’j…

Ik misse boekhaandel Zwikstra in Wolvege now al, want ik mos een boek kopen veur mien ooldomkezegger Miles. Die zie ik op eerste kastdag in Arnhem en dat joongien moet vanzels opgruuien mit een protte boeken. Bi’j Bruna in Oosterwoolde he’k Het vrolijke voorleesboek van Kikker van Max Velthuijs veur him kocht. Dan kun zien oolden him daor mooi uut veurlezen. En netuurlik krigt hi’j de beide kienderboeken die ik in et Stellingwarfs vertaeld hebbe van me. Et laompien dat een varken is van Pim Lammers en Pake en beppe Pluus van Dick Bruna. Die boeken heurt hi’j gewoon te hebben.