Frisian Queen

Twie jaor het et vanwege corona niet kund, mar vandaege kon et eindelik wel weer! We hadden vandaege de jaorlikse boottocht veur de post-aktieven van de belastingdienst. Ik hebbe vandemorgen Jan, Durkje en Riemie in Wolvege oppikt en doe biwwe naor Akkrum reden. Daor biwwe om tien ure mit ongeveer honderd man an boord gaon van de Frisian Queen. Daor biwwe trouwens wel es een peer keer eerder mit vot west. Slimme belangriek was vanzels dat alle eten en drinken gratis was. We begonnen de veertocht mit een bakkien drinken en een hiempe oranjegebak! We bin vanof Akkrum bi’j Grou langes naor De Veenhoop veerd en doe via Eernewoolde weer naor Grou. Et was prachtig weer, et kon wat dat anbelangt niet beter. Om half iene konnen we an boord genieten van een waarm buffet. Heerlik! Ik bin aanders gien grote eter, mar ja, et was veur niks… Dat ik hebbe me nog mar es opschept. Ie moe’n d’r zokke daegen wel van profiteren! Pattie meensken schepten wel drie keer op! Zoks kriej’ as alles vergees is. In Grou hebben ze oons een ure loslaoten, dat we hebben lekker wat deur dat mooie dörp ommebeinseld. Op ‘e weerommereize naor Akkrum gong de bediening mit lekkere waarme happies bi’jlanges! Et kon vandaege niet op! En ja, doe was die mooie dag al weer veurbi’j. Hieronder een foto die ‘k maekt hebbe doe et even wat betrokken was. Even laeter was de zunne d’r weer bi’j. D’r weren best al wel een boel boten op et waeter. Disse tegenligger kwammen we vlak veur hotel-resteraant Ie-Sicht tegen. Veur mi’j was de hiele route overbekend, mar ik hebbe d’r toch slim van geneuten. Mooi om es weer mit alleman praoten te kunnen!