Frisian Queen

Vandaege wa’k mit de jaorlikse boottocht vot van de ex-kollega’s van de belastingdienst. D’r weren anzienlik minder dielnemers as vleden jaor. Van ’t jaor mossen we dattig euro eigen bi’jdrege betaelen, vleden jaor vule minder of hielemaole niks. Dat wee’k niet iens meer. Mar daoromme zullen de meensken et toch niet zitten laoten hebben? Et is altied hiel genoeglik en praot zoe’n dag nog es mit alderhaande volk. We bin om tien ure vandemorgen an boord gaon van de Frisian Queen in Akkrum. We weren nog mar krek an boord of et begon allemachtig te regenen. Et was dus gien weer veur een kotte broek, zoas aandere jaoren vaeke wel. Mar we wodden goed verzorgd. We kregen eerst een peer bakkies drinken mit een hiempien oranjegebak. En veerder konnen we zovule drinken awwe mar wollen. We bin eerst naor De Veenhoop en Eernewoolde veerd. Daor bin ‘k vleden weke ok nog langesveerd… Ik kenne et daor allemaole sekuur. In Eernewoolde was et waarme eten klaor en konnen we an boord te zette gaon op een heerlik buffet. Hiel arg lekker, mar vule zooltener as dat ik wend bin. Ik kreeg d’r ommeraek dust van. Van Eernewoolde biwwe naor Grou veerd. Onderwegens regende et weer ommeraek. In Grou wodden we loslaoten en konnen we een drie kertier ommekuieren. Van Grou biwwe weer naor Akkrum veerd. Onderwegens kregen we nog een peer lekkere waarme happies. Wat wil een meens nog meer. Even veur vier ure wawwe weer in Akkrum en was die dag al weer veurbi’j. Hieronder een foto die ‘k vandemiddag maekt hebbe. Dit is de Sunt Pieter in et mooie centrum van Grou.