Friese Boekeweke

Een schoffien leden wa’k in Wolvege bi’j Vewo om pasfoto’s maeken te laoten veur et ni’je riebewies. Ik kon over een peer weken nog wel es weer kommen, zee de eigener, digitaal was et in twie daegen klaor. Ik kreeg een foolder mit en zag thuus drekt dat dat niet goedkommen zol. Ik zol d’r online ongetwiefeld in verbroezen. Ik hebbe laeter de pasfoto’s wel maeken laoten en daor bin ‘k vandemorgen mit naor et gemientehuus west. Now duurt et een peer daegen langer, mar ik hoeve d’r gien liefzeerte van te hebben. Ik wil op disse leeftied aenlik nargens liefzeerte meer van hebben.

Van 8 tot 16 november is de Friese Boekeweke. Ik hebbe vleden weke deensdag tillefonisch een boek besteld bi’j de boekewinkel op ‘e Gediek. De laeste roman van Durk van der Ploeg: De ierde giet troch minskehân teloar. As kedoboek zo’k dan vergees et boek van Anne-Goaitske Breteler kriegen: Oan ‘e ein fan De Oere. Durk is een schoffien leden 95 jaor wodden en hi’j schrift mar deur. Elke dag urenlaank. Dan bi’j’ in mien ogen pas een echte schriever. Et zol me gien ni’je doen as hi’j intied alweer een ni’j manuskript klaorliggen het. Ik hadde vleden weke deensdag ofpraot da’k de boeken vandemiddag ophaelen kon. Dat ikke drekt nao et eten in de auto naor De Gediek. Daor laggen gien boeken veur me klaor en et vrommes dat me hulp wus nargens van. Now ja, ik komme wel es in Liwwadden. Dat boek van Durk moe’k  vanzels wel hebben, want ik hebbe al zien romans. Hieronder nog een foto : De Gediek vandemiddag.