Friese boeken

Vandemorgen he’k Jarina op vesite had. Dat zol in november al, mar d’r was altied wat en et wodde almar weer uutsteld. Mar now het ze d’r dan toch west. Ze brocht een boek weeromme dat ze van me liend hadde en we hebben genoeglik bi’jpraot. Poes was ok slim op schik, want Jarina nemt altied lekkere kattesnupies veur him mit. Niet van Whiskas mar van Felix, mar die lust poes ok wel. Ik kreeg ok nog twie mooie boeken van heur kedo. It each fan Eelke, een boek mit de mooiste kollums die Eelke Lok veur de Friese radio verteld het. Mooi! Ik vertelde vroeger, om de ieuwwisseling henne, kollums in et radiopergramma van Eelke: It Wapen fan Fryslân. En nog niet iens zo lange leden hewwe tegere optreden op een aovend in Et Vene. En ik kreeg ok et boek Ik ha’t ris hân… van Ype Poortinga. Poortinga is vanzels slimme bekend wodden deur zien boeken mit volksverhaelen. Ik zal beide boeken ongetwiefeld mit genoegen lezen gaon.

Riegelmaotig krieg ik kaorten toestuurd van Harry as die in een museum is. Vandaege kwam d’r een kaorte van him vanuut Museum Dr8888. Op ‘e kaorte hieronder de ofbeelding van Duet foar hoarn en houn van Jan Frearks van der Bij (1922-2013). Eulievarve op doek. Ik zal Harry ok es weer een kaorte vanuut een museum sturen. Veur wat heurt wat!