Fries Museum

Een dag of wat leden kree’k een kaorte van Harry vanuut et Drents Museum in Assen. Die was daor naor de tentoonstelling van Frida Kahlo west. Dat was een goed veurbeeld veur mi’j. Ik bin vandemorgen eindelik es weer (mit een mondkappien op) in de trein stapt. Ik hebbe nog verschillende treinkaorties die bruukt wodden moeten, mar dat kon nooit vanwege corona. Ik hebbe now iene opbruukt die op 21 meert niet meer te bruken wezen zol. Ik bin naor et Fries Museum in Liwwadden west en hebbe daor de tentoonstelling á la Campagne bekeken. Het Franse licht van Maris tot Monet. Prachtige romantische schilderi’jen. De schilderi’jen die in Liwwadden te zien binnen, kommen uut Museum Boijmans Van Beuningen in Rotterdam. Mit varve en schildersezels trokken de Fraanse schilders indertied naor de bossen van Barbizon en ok Nederlaanse schilders gongen butendeure zitten te schilderen. Zo kuj’ in Liwwadden dwaelen deur laandschoppen van Cézanne, Renoir, Monet, Pissarro, Gauguin, Maris, Van Gogh, Mesdag, Sisley en nog een protte aanderen. Doe ‘k alles bi’jlanges west was, bin ‘k weerommelopen naor een peer schilderi’jen die grote indrok op me maekt hadden. Zoks doe ‘k haost altied. In dit geval: Landschap met koeien aan het water van Willem Roelofs en Zeegezicht met drooggevallen bomschuit van Hendrik Willem Mesdag. Zo mooi! In et museumresteraant he’k wat drinken en een lekkere tosti had. Aachter mi’j zat een vrouw Stellingwarfs te praoten. En doe bin ‘k nog even over de vri’jdagsmark gaon en hebbe sukerbolle, bolties, koekies en manderijnen kocht. Hieronder een foto die ‘k in et museum maekt hebbe. Dat moch. Dit is dus Landschap met koeien aan het water van Willem Roelofs (1822-1897). In et echt is et vanzels vule mooier as op disse foto!