Frederiksoord

Ien keer in et jaor komt mien Fryske freon Douwe hier en dan gao’we fietsen. Douwe mag dan altied de fiets lienen die vroeger van Fokje was. Vandaege was et weer zoveer. Naodawwe hier vandemorgen wat drinken had hadden mit appelgebak d”r bi’j biwwe op ‘e fiets stapt en over Steggerde en de Heerlikhied De Eese naor Frederiksoord reden. Daor hewwe op et terras van museum De Proefkolonie wat drinken en eten had en vervolgens hewwe dat prachtige museum bekeken. Ik hadde et al wel es eerder zien, doe koj’ d’r nog niet terechte mit een museumkaorte. Dat kon now dus wel. Op ‘e weerommereize kregen we een allemachtige bujje op ‘e huud. We hebben mit twie aandere manluden, die uut fietsen weren, schoeld onder een grote boom an de Jokweg op ‘e Hoeve. Naodawwe een uurtien thuus west hadden, biwwe naor resteraant De Rustende Jaeger in Hooltpae gaon en daor hewwe heerlik waarm eten had. Ik hebbe heekfilet had. Hieronder een foto van een mooie dag. Dit is et ‘kesteeltien’ van de aodellike femilie Van Karnebeek op ‘e Eese. Et was veur poes trouwens ok een mooie dag. Douwe hadde drie soorten brokkies veur him mitneumen. Vandemorgen wol poes d’r niks van hebben, mar vandemiddag luste hi’j inienend alles wel. Wondelik!