Frederiksoord omme

Vandemorgen he’k al mien elf ammarillen in et pikkeduuster zet. Dat moet elk jaor op 1 oktober. Ze blieven daor dan een vorrels jaor staon zonder dat ze waeter kriegen. Op ni’jjaorsdag hael ik ze weer veur ’t locht en dan kriegen ze ni’je potgrond en waeter. En dan duurt et een peer weken en kommen de eerste knoppen!

Naoda’k vandemiddag een opwaarmd proesien stamppot rooie kool behaffeld hadde,  bin ‘k weer op ‘e fiets stapt. Et was nog altied biezunder mooi zunneschienweer en heerlik fietsweer. Ik bin over De Hoeve en Steggerde naor de Heerlikhied De Eese fietst en doe over Eesvene en Ni’jensliek naor Frederiksoord. Vervolgens over Wilhelminaoord, Noordwoolde en Berkoop weer naor huus. Mit mekeer was dat een tocht van 40 kilemeter. Morgen nog en dan is et mooie weer veurlopig veurbi’j. De naachten wo’n al beheurlik fris. Sund et laeste weekaende lig ik naachs al lekker tussen de Duutse laekens. Hieronder twie foto’s van vandaege. Boven: et mooie oolde postkantoor van Frederiksoord. Onder: de Nicolaaskarke van Ni’jhooltpae in de haastzunne.