Frederik X

Denemarken is ien van de 43 lanen die de monarchie as staotsvorm hebben. Dat laand kreeg vandaege een ni’je keuning.Via een livestream hebbe ik et vandemiddag volgd op mien ni’je en grote komputerscharm. Deens verstaon is trouwens nog niet zo makkelik. Et was mooi en ok wel ontroerend om te zien. Margrethe allienig in een koets die tussen honderdduzend Denen deurree en bejubeld wodde. De ni’je keuning kon et bi’jtieden niet dreuge holen en raekte op et balkon wat emotioneel. Tante Heabeltsje uut Sneek zol van emotionaal zeggen. Et is vandaege percies 52 jaor leden dat Margrethe heur vader Frederik IX, die wegraekt was, opvolgde. Et was altied de gewoonte en blief daor tot je dood keuning of keuninginne. Zi’j het mit die tredisie breuken en 87% van de Denen vun dat ze geliek hadde, zeker now heur gezondhied wat minder wodde. Waoromme zoj’ toch ok tot je dood zitten blieven moeten? Laot ze nog wat genieten van de jaoren die heur nog geven binnen. Keuning wezen liekt me gien baene om te begeren. Ie doen et nooit goed, kun et nooit iederiene naor de zin doen, liggen altied onder een vergrootglas, elke stap en misstap wodt riggestreerd. Ik geef et je te doen in disse tied. Mar aj’ dichte bi’j de meensken staon kunnen, kuj’ d’r ok hiel wat moois van maeken. Dat is Margrethe II in 52 jaor tied meer as lokt. Frederik X het zien moeder as groot veurbeeld.