Franeker omme

We bin vandaege de hiele lange dag mit de boot et waeter op west. Van vandemorgen kwat over 10 tot 7 ure vanaovend. D’r ston nog best wat wiend, mar de temperetuur leup op naor 25 graoden. Heerlik weer! We bin om de noord gaon. Eerst naor Deinum en doe naor boven. Vlak boven Deinum weren straoljaegers an et oefenen. Een mooi gezicht. Hoge in de locht vleugen iederkeer twieje stief naost mekeer en dan kwammen d’r zomar inienend goenend hiel lege anvliegen. Een protte geluud. Mar ja, et moet wel, want Poetin stopt niet. We bin deur Menaldum en Berlikum veerd en doe via Ried en Dongjum naor de akedemiestad Franeker. Van half 2 tot half 3 hewwe lekker eten op et terras van de Stadsharbarg. Wat een mooi plakkien! Weeromme biwwe onder Dronriep deur weer naor Deinum veerd. Et was een prachtige dag!

En dan nog even over gisteraovend. Et was een mooie aovend en een mooi ofscheid van burgemeester André van de Nadort, die een protte mooie woorden over himzels te heuren kreeg. De biezundere raodsvergeerdering wodde veurzeten deur de ni’je (tiedelike) burgemeester Stieneke van der Graaf. Daor bin ‘k dus ok mit in de kunde kommen. Kommesaores Brok hul de eerste toespraoke. Ik hebbe mien andiel d’r goed en zonder haeperen van ofbrocht. Mit een protte meensken he’k laeter praot en de happies en draankies weren heerlik. Hieronder nog 2 foto’s die maekt binnen deur Lenus van der Broek. Boven: Hier bin ik an et woord. Rechts zit de ni’je burgemeester. Onder: André van de Nadort en ik bi’j et gedicht da’k veur him maekt hebbe. Tegere mit wethoolder Hoen he’k et onthuld.