Franciscus

Ie zullen paus wezen, 88 jaor wezen, en een slechte gezondhied hebben. En dan nao et urbi et orbi en een rondrit over et Sunt Pietersplein op eerste paosdag uut de tied raeken op twiede paosdag. Dat het toch ok wel wat moois en symbolisch. Een roman- en filmskriptschriever zol et haost niet zo bedaenken kunnen. Paus Franciscus leek me een gewonere, meenseliker en sympathiekere paus as zien veurgangers. Hi’j zette zels kleine stappies in de richting van de lhbti+-gemienschop. Dat wil niet zeggen dat zien opvolger grotere stappen zetten zal. Die kan wel stappies weerommezetten. De Rooms-Kattelieke Karke is en blift een oerkonservatief instituut mit een niet al te schoon verleden.

Wat was dat een stomme fout in et dagboekstokkien van gister. Ik kreeg d’r zels een mail uut België over. De Schieve Deure is de naeme van de leegstaonde harbarg op ‘e hoeke in Ni’jhooltpae. Mar oons mfc hiet vanzels De Ni’je Stienze. Dit in tegenstelling tot de oolde stienze: de Friesburg of Liemburg. Die ston eertieds an wat now de Vriesburgerweg is. Die stienze wodde vernield deur et Gelderse raprut in 1514 en laeter ok nog in de braand steuken. Ik hebbe nog een stienen kenonskoegel, die daor honderd  jaor leden tiedens et muddejaegen opgreuven is. Die oolde stienze was de stamstienze van de femilie Lycklama à Nijeholt.

Ik hebbe vandaege wat bosschoppen daon en een boerekeek bakt. Een dag of wat leden he’k een botterkoeke bakt mit een vulling van fiensneden dreugde proemen en amandelschaefsel in gembersiroop. Ze bin allebeide hatstikke lekker wodden.