Fouten

Ik perbere altied slimme sekuur te wezen en gien fouten te maeken. Mar soms ontkomt et me lillik. In et stokkien over Alles voor de reis, dat prachtige boek van Adriaan van Dis, hadde ik et over nikotinepleisters. Dat mos vanzels morfinepleisters wezen. Wat een stomme fout! Arend van Terwispel zag et votdaolik en mailde me d’r over. Aanders gieniene. Is et echt gieniene aanders opvalen? Lezen jim niet goed of daenken jim da’k zo staorigan een wat sullige, oolde man an ’t wodden bin en dat sullige, oolde mannen now ienkeer fouten beginnen te maeken. Zit et zo? Een peer daegen daorveur schreef ik onthoolt mit een t an et aende. Et is vanzels onthoold mit een d an et aende. Daor he’k hielemaole niks van heurd. Doe et op internet ston zag ik et zels netuurlik drekt. Mar ja, doe kon ik et niet meer veraanderen. Dat kan webmaster Pieter allienig mar. En ik mierke Pieter niet om de kop over een d en een t. Mar jim kun van me annemen dat elke fout me slim in de wege zit. Misschien zit d’r ok wel weer een fout in dit stokkien. Ik wil wel es wat te vlogge…

Et is vandaege roet- en roetkoold in Ni’jhooltpae. D’r staot een ieskoolde wiend uut et oosten die over de velden wi’jt. Et vr?st mar twie graoden mar de gevuulstemperetuur is omtrent min tiene. De post is niet bezorgd en ik komme niet butendeure. Poes floept d’r wel zo now en dan even uut, mar is ok hiel gauw weer in huus. En hier in huus he’k now in twie ammarillen een dikke knoppe zitten. Dat is nog niet vule, mar ik hope en verwaachte zeker op nog meer.