Fotosessie
Plaetst op 17 meie 2022.
Vandemorgen he’k naor kapster Bertha in Et Vene west om me et haor bekubben te laoten en netties maeken te laoten veur de fotosessie van vandemiddag. Bi’j Bertha he’k eerst thee mit koeke mit botter d’r op had. Vervolgens het ze een ure doende west om me toonber te maeken. En doe he’k bi’j heur eten: een koppien ossestatsop, een croque madame, een krekkertien mit rookte zalm en nog een bakkien thee. En doe bin ‘k nog gauw even naor huus toe west.
Om twie ure vandemiddag wa’k op et parkeerterrein bi’j de Ooldelaemster Brogge veur een fotosessie mit Rob de Wind die tot kwat veur vufe duren zol. D’r mossen altied nog foto’s van me maekt wodden omdat d’r een foto van me in et gemientehuus komt te hangen. Omda’k vleden jaor ereburger wodden bin. Vleden jaor bin d’r ok al een hieleboel foto’s van me maekt in de karke van Scharpenzeel. Ikke in nette kleren… Mar alles is doe deur de gemiente ofkeurd. Ik mos op petret in vri’jetiedskleren in de netuur van West-Stellingwarf! Et was vandemiddag smoorhiete, mar een kotte broek en een shirtien kon vanzels niet. Dat ik hadde een stevige spiekerbroek an, een boezeroen en een rood truigien. Dat was mooi veur de foto’s, mar ik zwiette me dood. Rob hadde een bottien van Staotsbosbeheer aachter et glas van de auto, dat we mochten overal mit de auto kommen. We bin eerst naor de Scheenesluus reden. Daor bin op twie plakken foto’s van me maekt mit B&B De laeste stuver en meule de Rietvink op ‘e aachtergrond. Tal van meensken herkenden me en stopten. Wat mos dat toch? Ze dochten dat d’r foto’s maekt wodden veur et omslag van een ni’j boek. Nao de Scheenesluus biwwe naor et aende van de Laampenvaort reden. Daor staot een oolde iekenboom op zes stammen. Daor mos ik ok op petret. D’r wodden drie grote laampen, een agregaot en wiethoevule fotospul uut de auto laeden. Ok daor hawwe een protte bekieks en we wodden d’r zowat lek prikt deur de nefies. En doe was et om kwat veur vufe eindelik klaor. En now mar hopen dat d’r iene foto tussen zit die goed genoeg is. ‘Relaxen,’ reup Rob vandemiddag iederkeer. Dat kostte muuite! Hieronder een foto van de Scheene die ‘k vandemiddag zels maekt hebbe.
Om twie ure vandemiddag wa’k op et parkeerterrein bi’j de Ooldelaemster Brogge veur een fotosessie mit Rob de Wind die tot kwat veur vufe duren zol. D’r mossen altied nog foto’s van me maekt wodden omdat d’r een foto van me in et gemientehuus komt te hangen. Omda’k vleden jaor ereburger wodden bin. Vleden jaor bin d’r ok al een hieleboel foto’s van me maekt in de karke van Scharpenzeel. Ikke in nette kleren… Mar alles is doe deur de gemiente ofkeurd. Ik mos op petret in vri’jetiedskleren in de netuur van West-Stellingwarf! Et was vandemiddag smoorhiete, mar een kotte broek en een shirtien kon vanzels niet. Dat ik hadde een stevige spiekerbroek an, een boezeroen en een rood truigien. Dat was mooi veur de foto’s, mar ik zwiette me dood. Rob hadde een bottien van Staotsbosbeheer aachter et glas van de auto, dat we mochten overal mit de auto kommen. We bin eerst naor de Scheenesluus reden. Daor bin op twie plakken foto’s van me maekt mit B&B De laeste stuver en meule de Rietvink op ‘e aachtergrond. Tal van meensken herkenden me en stopten. Wat mos dat toch? Ze dochten dat d’r foto’s maekt wodden veur et omslag van een ni’j boek. Nao de Scheenesluus biwwe naor et aende van de Laampenvaort reden. Daor staot een oolde iekenboom op zes stammen. Daor mos ik ok op petret. D’r wodden drie grote laampen, een agregaot en wiethoevule fotospul uut de auto laeden. Ok daor hawwe een protte bekieks en we wodden d’r zowat lek prikt deur de nefies. En doe was et om kwat veur vufe eindelik klaor. En now mar hopen dat d’r iene foto tussen zit die goed genoeg is. ‘Relaxen,’ reup Rob vandemiddag iederkeer. Dat kostte muuite! Hieronder een foto van de Scheene die ‘k vandemiddag zels maekt hebbe.