Fotosessie

Vleden weke kree’k een mail van de heufdredaktie van de Liwwadder Kraante. Alle kommetaorschrievers en kollumnisten wodden nuugd veur een fotosessie op ‘e redaktie van de kraante in Liwwadden. De (online)vormgeving van kommetaor en kollums moet beter prissenteerd wodden. Et moet allegeer beter opvalen in de kraante. D’r ston: U geeft persoonlijk vorm aan onze identiteit en bent een gewaardeerd gezicht/uithangbord van de LC. Om et allemaole wat liek te trekken mossen van oons allemaole rompfoto’s maekt wodden. Dat we wodden vandaege tussen tien en ien ure verwaacht. Ik was d’r om elf ure en et was een hiel gedoe om d’r te kommen. D’r was tiedelik een aandere ingang in verbaand mit verbouweri’je. Dat ik mos et hiele gebouw omme lopen en daor was inderdaod een verbouweri’je. Ik bin mar deurlopen en kwam in kantoreboel terechte die niks mit de kraante te maeken hadde. Dat ik mos weeromme naor de ingang en daor op een knoppien drokken van de Liwwadder Kraante. Ik hadde die knoppeboel niet zien omdat d’r twie vrouwluden veur stonnen die ok uutzochten hoe ze d’r mit an mossen. Die beide vrouwluden wodden ophaeld deur de heufdredakteur en die het mi’j doe ok mitneumen naor de fotosessie. Marcel de Jong zette daor iederiene op petret. Sportverslaggever en kollumnist Sander de Vries was veur mi’j en doe die klaor was moch ik. Marcel het me op petret zet in een rood truigien en in ien van mien ni’je boezeroenen. Hi’j zee hoe a’k staon mos en hoe a’k de aarms en hanen holen mos. En doe was et klaor. Dit is werachtig gien hobby van me. Ik vien zokke dingen niet echt aorig om te doen. Ik bin vanzels wel beni’jd wat et wodden zal. Ik hope vurig dat et deur keunstmaotige intelligentie meugelik is om me dattig of veertig jaor jonger te maeken. Zoks maj’ in disse tied toch werachtig wel verwaachten.

Nao de fotosessie bin ‘k weer naor huus gaon. Thuus he’k een beschuut en een krekker had en doe bin ‘k weer in de auto stapt en naor Sneek reden om de verjaordag van Gerda mit te vieren. Et was hiel gezellig mit een protte heerlike happies en draankies.