Fisk

Vandemorgen betied he’k naor Marian in Wolvege west veur fysio-massage. Laeter op ‘e morgen kwam Jarina hier even op vesite. Ze brocht een boek weeromme dat ze van me liend hadde en ik hebbe heur twie vervolgboeken van Hjorth Rosenfeldt mitgeven. En veerder hewwe even bi’jpraot en ik kreeg ok nog wat boeken van heur die ‘k zeker lezen zal. Et is de bedoeling da’k van ’t jaor ok weer wat postzegelvellegies maeken laoten zal deur PostNL en daor helpt ze me dan weer bi’j. Vleden jaor is dat overgaon.

Om half vufe vandemiddag wa’k bi’j uutgeveri’je Bornmeer op ‘e Gediek. Daor was een alderplezierigste bi’jienkomst mit zoe’n veertig meensken naor anleiding van et uutkommen van et boek Fisk van Douwe Kootstra en Tjibbe Hooghiemstra. In et boek staon mooie verhaelen van Douwe en lieke mooie illestraosies van Tjibbe. Douwe vertelde twie verhaelen en d’r was een tentoonstelling van de illestraosies van Tjibbe. In 2021 verscheen d’r een boek van de beide mannen mit de titel Stabij. Dat kwam doe in et Fries en Nederlaans uut. Fisk is allienig in et Fries uutkommen. Beide boeken hebben etzelde fermaot. Ik vien de illestraosies in Fisk mooier omdat die in kleur binnen. In Stabij weren ze in zwat/wit. Ik hadde et boek al lezen en kan et jim van hatte anraoden. Beide boeken bin ok utermaote geschikt om as kedogien vot te geven.