Fisk

Dit is een laet dagboekstokkien, mar ik bin krek thuus van een fesien. Dat was een fesien naor anleiding van et uutkommen van et boek Fisk van Tjibbe Hooghiemstra (illestraosies) en kammeraod Douwe Kootstra (verhaelen). Et feest was in et Tripgemael in Gersloot. Et was nog een hiele toer om daor te kommen. De navigaosie stuurde me een verkeerde weg in. Doe ston ik wel veur et Tripgemael, mar d’r zat een briede vaort tussen. Ik mos dus nog een stok ommerieden. Et was een mooi fesien mit een kleine 40 meensken en d’r was een waarm en koold buffet. Heerlik. Tussendeur was d’r een kultureel pergramme. Douwe las een verhael uut et ni’je boek veur, Bennie Huisman zong een stokmennig lieties in et Fries en begeleidde himzels, Tsjerk Veenstra vertelde over de schrieveri’je van Douwe en ik moch een toespraoke holen. Op 19 juni weren Douwe en Romkje 50 jaor trouwd en… ze hebben doe gien feest hullen. Ze bin stiekem op vekaansie gaon. En ik hadde me zo verheugd op een echte oolderwetse brulloft mit een orkessien en daansen en an et aende koffie/thee mit bolties keze en schinke. Weten jim dat nog? Die brulloften van vroeger. Daor gong mien verhael over. Dat hebben Douwe en Romkje oons dus deur de neuze boord. Mar dit fesien was ok mooi! Hieronder een foto die ‘k om half vufe, vlak veur et feest begon, maekt hebbe van et Tripgemael.