Filmlieties

Bi’j een film heuren ok meziek en eventueel lieties. Zoas bi’jveurbeeld een titelsong. Daenk mar es an Goldfinger. Steven de Jong stuurde me gister twie lietiesteksten veur de film Sultan. Hi’j schreef ze in et Nederlaans mit Stellingwarver woorden d’r deur. Et is nogal een klus om d’r goed en geef Stellingwarfs van te maeken en zo dat et ok in et Stellingwarfs riemt op plakken waor et in et Nederlaans riemt. Dat betekent hiele ni’je zinnen bedaenken die in de sfeer van et lietien passen. Et vertaelen van de Winterreise van Schubert het indertied een goeie leerschoele west. Ik hebbe gisteraovend meer as drie uren an ien van de lieties besteded. Hiel dom, want doe wa’k zo helder en allat da’k niet slaopen kon. Dat moet dus niet weer. Ik zal d’r zo now en dan an warken. Ik bin vandaege ok begonnen mit et rippeteren van verhaelen. Ik hebbe disse maond nog een viertal optredens, dat ik moet now zeker weer een tien of elf verhaelen uut et heufd vertellen kunnen. Elke dag moe’k mar wat doen.

Vandemiddag he’k nog een tochien van 23 kilemeter fietst. Naor Wolvege om wat bosschoppen en bi’j de Lende langes weeromme naor huus. Et was bi’jtieden lekker zunnig weer en soms spatterde et even. Bi’j Kontermaans raekte ‘k an de praot mit een man en een vrouw. De man vertelde dat hi’j me al kende doe ik nog een hiel klein joongien was. Hi’j mos omke zeggen tegen Eelke Kupers. Eelke kwam vroeger bi’j oons om kisten eier op te haelen. Ik zie him zo nog de keuken inkommen. Ik moch een paors stempel op die eier zetten. Dat stempel heb ik nog. Hieronder nog een foto van de Lende. Van tied tot tied is de Lende zowat dichtegruuid mit snieleboel en kan d’r kwaolik een kano meer deur. De boel wodt now weer opschoond.