Filmkarke in Hooltwoolde eupend

Harry en Frans zitten in Vaulx-en-Velin en Douwe en Romkje in Chantilly. Daenken ze dat daor et waarme weer te kriegen is? Now, dat waarme weer is hier. Wat een vremd weer is et vandaege. Et is 26 graoden en d’r staot een hadde, waarme wiend. Wonderlik. Ik bin in dat waarme weer vandemiddag op ‘e fiets naor Hooltwoolde gaon. Daor wodde de Filmkarke van Steven de Jong eupend. Ik bin d’r niet van et begin of an west en hebbe d’r ok niet optreden. Dat was me wat te vule. Doe ‘k d’r kwam zag et d’r zwat van et volk. De weg was ofsleuten. Overal stonnen auto’s en fietsen. In en om de karke was et smoordrok. Mar wat is et prachtig wodden. De Filmkarke is een geweldige anweenst veur de kultuur in de Stellingwarven en veer daor buten. Ik hebbe nog wel mitdaon an een podcasttaofel mit Steven de Jong, Sylvana IJsselmuiden, wethoolder Roelof Theun Hoen, Karst Berkenbosch, goechelder Lucas, Syb van der Ploeg en Wiebe Kaspers. Ik hebbe vanzels verteld dat Steven de Jong et verhael Sultan uut Naozoemerlaand verfilmen zal. Syb van der Ploeg het een stokmennig lieties zongen en wodde begeleided deur zien vaaste begeleider Wiebe Kaspers op ‘e piano. Geweldig! Hieronder twie foto’s. Boven: disse foto he’k vandemiddag van de Filmkarke van Hooltwoolde maekt. Onder: Douwe stuurde me een app mit een foto van et kesteel van Chantilly, ongeveer veertig kilemeter noordelik van Peries.