Film Sultan

Vandaege was et mooi fietsweer, dat ik bin even naor de biebeltheek in Wolvege west om boeken in te leveren en ik hebbe ok weer iene mit naor huus neumen. Et is de bedoeling dawwe morgen de hiele dag uut fietsen gaon! Vanaovend za’k weer naor de biebeltheek, dan vertelt Arjan Sterken, de direkteur van de Schrieversronte, daor over volksverhaelen.

D’r wodt drok warkt an de verfilming van mien verhael Sultan uut et boek Naozoemerlaand. Doe et in jannewaori onder de sni’j lag is d’r al mooi wat filmd. Ankem weke maendag en woensdag bin d’r van de vroege morgen tot de laete aovend dri’jdaegen in de Filmkarke van Steven de Jong in Hooltwoolde. Vleden weke ston d’r een grote foto in de Stellingwarver kraanten daor de speulders op staon. Ik vien et prachtig dat Sybren Hofstra uut mien eigen dorp Ni’jhooltpae de heufdrolle speult. Hi’j is Bauke uut et verhael en mag mit twie vrouwluden op bedde… Ik gao ankem weke woensdagmorgen even in de filmkarke kieken. Ik hoeve zels niks meer te doen. Karst Berkenbosch is d’r algedurig bi’j en die hoolt in de gaten dat et Stellingwarfs goed en geve bruukt wodt. De film wodt prissenteerd tiedens een groot en groots premiereweekaende: op 13, 14 en 15 november. Hool mar ien van die daegen vri’j en kom te kieken. De film zal ongetwiefeld meerdere keren vertoond wodden en d’r bin gesprekkies mit alderhaande meensken. Kaorten bin dan te bestellen via www.filmkerkwolvega.nl