Film & Fûke

Een schoffien leden kreeg ik van Steven de Jong et boek Film & Fûke dat schreven is deur Steven en Roely Boer. In et boek kuj’ percies lezen hoe et d’r an toegaot bi’j et maeken van een film. Een mooi kedogien now et d’r op liekt dat mien verhael Sultan verfilmd wodden zal. De Fûke is een bekende film van Steven de Jong. Et boek dat hi’j verfilmde wodde schreven deur Rink van der Velde en is misschien wel die zien mooiste boek. Et gaot over een visker die in 1943 oppakt wodt deur de Duutsers. Zien zeune Germ zit in et verzet. Van de Duutsers krigt hi’j te heuren dat Germ alles verteld het en dan wet hi’j dat et mis is. Hiel arg mis. Et viskershusien dat in de film veurkomt staot trouwens in Ni’jtriene. Et boek geft een prachtig overzicht van wat d’r allemaole wel niet gebeuren moet bi’j et maeken van een film. En dat is nogal wat. Tal van meensken die d’r an mitwarkt hebben, vertellen in et boek heur verhael: Peter Tuinman, Rense Westra, Hilly Harms, Syb van der Ploeg… En d’r staon vanzels een protte foto’s uut de film in.