Fietstocht

Vandaege he’k Jan en Diana uut Aalten op vesite had. Zi’j kommen ien keer in et jaor bi’j mi’j en ik gao ien keer in et jaor naor heur toe. We hebben aldergenoeglikst bi’jpraot. Tussen de middag hewwe hier bi’j mi’j eten. Ik hadde een panne gruuntesoep en bolties klaorstaon. Nao et ofwasken biwwe op ‘e fiets stapt en over et ni’je Lendepattien, dat zi’j nog niet zien hadden, naor de Driewegsluus fietst. En daor begon et te spatteren. Tussen de Driewegsluus en Ooldemark begon et hadder te regenen. Onder een boom bi’j een boerderi’je hewwe de regenkleren antrokken. D’r kwam een joongien bi’j oons die zee dawwe wel zolange op ‘e dele schoelen konnen. Dat hewwe daon. Et joongien vertelde dat hi’j laeter ok boer wodden wol. Hopelik komt zien droom uut… Op et laeste biwwe toch mar deur de regen deurfietst naor et overkapte terras van Hof van Hollaand. Daor hewwe wat drinken had mit een lekker gebakkien d’r bi’j. En doe konnen de regenkleren veerder uutblieven. Et wodde zels heerlik, zunnig weer. Om half vufe wawwe nao een kleine 44 kilemeter fietsen weer bi’j me thuus. Om half zesse hawwe ofpraot in resteraant Boszicht in Ni’jberkoop. Daor hewwe heerlik eten had. Wat is dat een goed adres! Daor kan Van der Valk echt niet tegenop. Bi’j Van der Valk kriej’ ok minder soorten gruunte bi’j et eten. Om twintig over zeuven bin Jan en Diana weer naor de Aachterhoeke gaon. In september za’k naor heur toe. Hieronder een foto van Jan en Diana vlak veur dawwe eten zollen in Ni’jberkoop.