Fietstocht vanuut Exloo

We hebben vandemorgen de fietsen aachter op ‘e auto zet en bin naor Exloo reden. Et was prachtig en zunnig weer mit 21 graoden. Schitterend fietsweer dus. We hadden de auto op et grote parkeerterrein staon bi’j et hotel en et vekaansiepark daor Jelle en ik in juni een midweke in een husien zeten hebben. Doe hebben we drie fietstochten maekt en we hebben now die eerste fietstocht van 16 juni nog een keer daon. Een prachtige tocht deur de bossen en bi’j grote lappen bluuiende heide langes. Een klein stokkien van de oorspronkelike route lag d’r uut en dat was niet al te dudelik angeven. Mar we bin d’r wel uutkommen. In Borger hewwe op een terras luncht. Ik hebbe een lekker boltien mit waarme bienschinke had. In juni he’k laeter nog een kollum over mien aeventuren op dat terras schreven en ik kan dat now wel weer doen. We bin vanzels an et aende ok nog even naor et husien fietst daor Jelle en ik in juni mooie daegen had hebben. D’r ston een blauwe auto bi’j de deure, et is dus weer bezet. Ik duste zodoende niet deur de raemen te loeren. Ie moe’n op et laeste je fesoen holen. Mar et vuulde daor nog hiel eigen an. Laot et zok weer blieven, dan kun we nog wat mooie fietstochten maeken. Hieronder nog twie foto’s die ‘k vandaege maekt hebbe. Boven: de karke van Borger tussen de bomen deur. Onder: een lappe bluuiende heide.