Fietstocht op woensdag

We hebben vandaege al weer een wondermooie fietstocht maekt. De temperetuur leup op naor 23 graoden, mar de zunne was d’r niet altied bi’j. Et was liekewel heerlik fietsweer. We bin weer deur bossen fietst en bi’j hoeken bouw en heidevelden langeskommen. En we kwammen ok weer bi’j enorme lappen laand langes mit bluuiende wilde bloemen. We hebben in Ni’jhooltpae bi’j de karke ok zoe’n mooi hoekien laand mit wilde bloemen. Mar zoks zol in de Stellingwarven wel vule meer kunnen. We kun wat dat anbelangt nog wel wat van de Drenten leren. We bin vandemorgen eerst naor Schoonoord fietst. Daor hewwe eten op et terras van resteraant Jor’s Haven an et Oranjekenaol. Jor het veur oons een pruveri’je van kleine lunchhappies klaormaekt. Heerlik! Jor kan d’r wel wat van. We hebben daor ok een bujje ofschoeld. Daornao was et weer prachtig weer en bin we staorigan op Odoorn an gaon. Daor hewwe vanzels weer naor de Plus west. Via een lange route deur bossen en bi’j heide langes biwwe doe weer naor Exloo gaon. Hieronder twie foto’s van vandaege. Boven: een Drentse boerderi’je mit peerden bi’j Valthe in de buurt. Jammer dat de zunne d’r doe niet bi’j was. Onder: in Frieslaand is et doodgewoon dat de plaknaemen ok in et Fries angeven wodden op ‘e plaknaembodden. In Drenthe is dat in et Drents ok hiel gewoon. Zie de foto hieronder. Ok wat dat anbelangt kuwwe nog wel wat van de Drenten leren.