Fietstocht op Preensiesdag

A’k op ‘e dadde deensdag van september huus bin, kiek ik altied naor Preensiesdag. Mar et was zok prachtig weer, et wodde mar liefst 25 graoden. Et zol mar zo de laeste mooie fietsdag wezen kunnen. Ik hebbe dus een fietstocht van 43 kilemeter maekt. Ik bin bi’j de Lende langes naor de Driewegsluus fietst. D’r ston wel een hadde wiend. Op et terras van et paviljoen he’k een bakkien drinken, een koppien tomatesop en een plakkien bolle mit een kroket had. En wie trof ik daor? Hennie van de Schrieversronte en heur man. Ze weren mit auto en fietsen onderweg naor heur vekaansieadres in et prachtige stattien Edam. Ik bin bi’j de Lende langes weerommefietst naor de Sas en hebbe zo now en dan even et live verslag van Preensiesdag op ‘e tillefoon bekeken. Ik bin et van hatte mit de keuning iens dat de demekraosie hiel goed bescharmd wodden moet. Meensken die pakken huj bi’j snelwegen in de braand stikken en rotzooi op et spoor gooien doen dat niet. Zoks is levensgeveerlik gekkewark. Van de Sas of bin ‘k naor Wolvege fietst en daor he’k wat bosschoppen daon. Van daor bin ‘k weer naor de Lende fietst en doe over et witte broggien naor huus. Op et fietspad naost de Noordwooldiger Vaort kwam ik Jan tegen. We hebben even praot over kwaolties en ongemakken. Hieronder een foto van et oolde huus van de sluuswaachter bi’j de Driewegsluus.