Fietstocht

Nooit eerder hewwe zo betied in et jaor een fietstocht maekt. Mar vandaege gebeurde dat dus wel en et is nog mar 3 april. Alles is bliekber op ‘e giebe in de wereld. We hebben een mooi tochien van 32 kilemeter maekt. We bin mit de fietsen aachter op ‘e auto naor de Driewegsluus reden. Wat hebben ze et daor mooi maekt veur de toeristen! We bin de Lendediek uutfietst en bi’j Jelle zien oolde stee langeskommen. As jonge van zeuventien fietste ik al naor him toe. Doe was de Lendediek nog niet iens verhadded. En now fiets ik as oolde knapperd, 62 jaor laeter in de tied, daor weer langes op een elektrische fiets. Now ja, ik fietse in ieder geval nog… Vanof Ossenziel hewwe over dat prachtige fietspad mit al die broggies naor Kaelenbarg fietst. Daor hewwe op een terras an et waeter wat drinken mit wat lekkers had. Ik hebbe Blokzielder Brokke had. Vervolgens biwwe in een straolende zunne mit almar hoger woddende tempereturen naor Ooldemark gaon en doe weer naor de Driewegsluus. Daor hewwe even op een baankien zeten om wat te drinken en te bekommen. En doe hewwe nog een slinger deur de Rottige Miente maekt. En van daor weer naor de Driewegsluus. Daor hewwe lekker eten op et terras in de zunne. Ik hadde et zwiet op ‘e rogge staon, zo waarm was et daor. Et was zodoende een dag mit een goolden zunneschienraantien. Overal zaggen we sturken op et nust staon. Iene klepperde dat zowat dee. Wat mooi is dat toch! De bomen zatten nog niet in ’t blad, mar wat bluuiden de trekkebekken mooi en de dotters, et speunkruud en de peerdebloemen. En almar bin de dotters weer geel. Wat zol et verrassend wezen as van ’t jaor de dotters inienend wit wezen zollen en de trekkebekken geel. Dan was de boel pas echt op ‘e giebe! Ik hadde ok een mooie foto in Kaelenbarg maekt, mar et versturen vanof mien tillefoon naor mien mailadres wol niet. Dit is dus een stokkien zonder foto. Ik snappe vanzels niet waoromme as dat niet wil.