Fietstocht

Ik hebbe vandaege een heerlike fietstocht van 42 kilemeter maekt. D’r was spietig genoeg gien zunne, mar et was utermaote zaacht weer. De buierader veurspelde gien regen, mar dat klopte niet hielemaole. Ik bin bi’j de Lende langes naor de Driewegsluus fietst en daor wodde et hielemaole gries en et begon zachies te miggelen. Ik hebbe de regenbroek antrokken en bin naor Ooldemark gaon. Daor he’k bi’j Family disse keer niet op et terras zeten, mar ik bin d’r ingaon. Ik hebbe daor zoas gebrukelik een bakkien drinken en een twaelfuurtien had. D’r kwammen meensken in die drekt mien naeme zeden. Et weren de uutbaoters van et beoemde resteraant Bos in Schoterziel. We hebben genoeglik even praot. Wi’j kommen geregeld bi’j de zuster van die vrouw te eten, want die zit in resteraant De Fûke in Echten. Nao et eten bin ‘k in de richting van Blesdieke fietst en op et west van Blesdieke naor de Sas en van daor naor Wolvege. Daor he’k bosschoppen daon en mit de fietstassen hatstikke vol eten en drinken bin ‘k naor Vrouwkje in Hooltpae gaon. Daor he’k een peer bakkies thee had en we hebben bi’jpraot. Nog even en dan gaot ze naor een flat in et centrum van Oosterwoolde. Ik zal daor zeker bi’j heur kieken.