Fietstocht

Nao de boottocht van gister he’k vandaege een lekkere fietstocht maekt. Et was al meer as een maond leden da’k dat doen kon. Eupen Stal en ziekenhuus gooiden wat dit anbelangt roet in et eten. Ik bin bi’j de Lende langes naor de Driewegsluus fietst en doe over de Scheenesluus naor et bedoeninkien an de Van Helomavaort. Daor he’k wat drinken en een brotien hamburger had. Vervolgens bin ‘k deur de Braandemeer fietst en doe op Wolvege an. Daor he’k wat bosschoppies daon en ik bin doe op huus an gaon. Mit mekeer 52 kilemeter. Onderwegens hong her en der de heerlike locht van pas mi’jd grös. Ik fietste ok bi’j een grote koppel gaanzen langes die slim roer weren. Ik vien dat prachtige voegels, ze kommen best vaeke in mien boeken veur. Meensken die zeggen dat d’r te vule gaanzen binnen, nemen een lopien mit de waorhied. D’r bin niet te vule gaanzen, mar eerder te vule meensken. Ik kieke altied a’k de gaanze mit et joongien op ‘e rogge ok zie. En Gustaaf mit de kraanze blauwe veerties om de hals. Ze bin wel argens, mar ik zie ze nooit. Hieronder een foto van de Scheene die lag te stoven in een waarme augustusmiddag.