Fietstocht

Gistermiddag he’k even an de Industrieweg in Wolvege keken daor Computerservice Hofma komt. Jarmo en zien vader weren d’r drok an ’t wark. Et wodt mooi, mar wat een wark… De peinze moet d’r daor ommeraek op!

Et is et mooiste weer van de wereld, dat ik hebbe vandaege een fietstochien van 44 kilemeter maekt. Ik bin bi’j de Lende langes naor de Driewegsluus reden en doe naor Ooldemark. Daor he’k tussen de middag een twaelfuurtien had op et terras van resteraant Hof van Hollaand. Neffens mi’j hiet et now van Family, mar ik blieve van Hof van Hollaand zeggen. Dat vien ik een mooiere naeme. Ik kreeg een koppien  tomatesoep, een plakkien bolle mit een kroket en een plakkien bolle mit een mini-uutsmieter. En dan nog een bakkien drinken d’r bi’j. Daornao bin ‘k veerderfietst over Blesdieke en De Blesse naor Wolvege. Daor he’k wat bosschoppies daon en doe bin ‘k weer op huus an gaon. Wat een lekkere dag! Ik gao morgen en overmorgen ok fietsen. Et kan now!

Gister kwam d’r een appien mit een foto van Douwe en Romkje. Ze bin op vekaansie in Schuld am Ahr in de Noord Eifel. Zo te zien is de Ahr een soortement Lende.