Fietstocht

Gister he’k tillefonisch kontakt had mit de chirurg die me oppereerd het. Omdat alles nog niet gaot zoas et gaon moeten zol, het ze me wat medesienen veurschreven en ze belt me over een weke weer. En toch… biwwe d’r vandaege es weer een dag op uut west. We hebben een fietstocht van krap 50 kilemeter maekt. Een betien te gek? Vuuftien daegen naoda’k oppereerd bin… Now ja, ik vuulde me wel aorig goed en et fietste zo lekker deur… We bin van hier over De Hoeve, Steggerde, De Eese en Wilhelminaoord naor Frederiksoord fietst. Daor hewwe op et terras van Museum de Proefkolonie wat drinken had mit wat lekkers d’r bi’j. Vervolgens biwwe over Vledder, Vleddervene, De Oosterstreek en Buil naor Berkoop fietst. Daor hewwe op et terras van Hotel Lunia een peer plakkies bolle had. Ik trof daor meensken uut Hooltpae die me ok al es op et terras van de theetuun an de Dwasvaortweg tegenkommen weren. Now ja, ik zitte vaeke op terrassen. Een vrouw vertelde me dat ze vleden weke mien ni’je boek van me kocht hadde en dat ze de eerste verhaelen die ze lezen hadde hiel mooi vun. Daor doe ‘k et dus veur! Ik bin now weer thuus en wete wel zeker da’k aanst in de stoel in de slaop valen zal. Hieronder een foto van een libelle die me vandaege toestuurd wodde deur Tjerkje.