Fietstocht

Gisteraovend he’k tot tegen twaelf ure op Canvas keken naor de prachtige en ontroerende film Maurice mit Hugh Grant en James Wilby. Een film om stille van te wodden. Twie mannen uut de betere kringen die van mekeer holen, mar de iene (Hugh Grant) dust him niet te onttrekken an de burgerlike moraal en trouwt mit een vrouw. Schitterend akteerwark! Nao die mooie film was et vandaege schitterend fietsweer, dat ik hebbe een tochien van 44 kilemeter maekt. Over Steggerde en de Heerlikhied De Eese bin ‘k naor Frederiksoord reden. Daor he’k in de tuun van et Huygens Huys (et vroegere postkantoor) wat eten en drinken had. Een heerlik brotien mit rookte zalm. In Frederiksoord bin ze zo verstaandig west en slao et mooie, oolde postkantoor niet tegen de vlakte, zoas ze in Wolvege en Et Vene wel daon hebben. Op ‘e biologische streekmark he’k bi’j bakker Bolhuus bolle en lekkere koeken kocht veur de vesite die morgenvroeg komt. Vervolgens bin ‘k veerderfietst. Over Vledder, Vleddervene en Noordwoolde bin ‘k weer op huus an gaon. Hieronder een foto die ‘k vandemiddag maekt hebbe. Een oold, mar mooi opknapt husien in Vledder.