Fietstocht

Gister he’k een flut woorden en zinnegies vertaeld vanuut et Nederlaans in et Stellingwarfs. En dat veur een keunstprojekt in Noordwoolde. Ik hebbe te vule zittend wark, ik moet meer beweging hebben. Butendat schrok ik doe ‘k gister weugen wodde bi’j Fysiosport. D’r moe’n ok nogal wat kilo’s of. Vandaege bin ‘k dus in beweging west. Ik hebbe een fietstocht van 44 kilemeter maekt. Over De Hoeve en Steggerde bin ‘k naor de Heerlikhied De Eese fietst en doe over Ni’jensliek naor Frederiksoord. Onderwegens naor Noordwoolde he’k op et terras van Family in Wilhelminaoord wat drinken en een twaelfuurtien had. En doe bin ‘k veerderfietst naor Noordwoolde en Berkoop. Bi’j de Kuunder langes bin ‘k weer op huus an gaon. Op ‘e Hoeve lag et mi’jde grös an ’t zwil. En dan al die bluuiende brem, meidoorns en witte en rooie kestanjes. Schitterend! Mar de peerdebloemen bin al zowat weer uutbluuid… Doe ‘k thuus was he’k een kollum in klad schreven die de titel Efteling kregen het. Dat zegt vermoedelik wel genoeg. Ik hebbe onderweg ok een peer foto’s maekt. Boven: dit is et laandhuus op ‘e Eese van de aodellike femilie Van Karnebeek. Onder: dit is Huze Westerbeek in Frederiksoord. Hier zetelt de Maotschoppi’je van Weldaodighied.