Fietsroutes

Vandemorgen wa’k al om even veur negen ure in de radiostudio van Odrie in Oosterwoolde. Daor trof ik Agnes Dokter, perjektmitwarker gebiedsontwikkeling en technikus Andries Oppersma. Ie kun aanst twie verschillende fietsroutes deur et biodiverse kultuurlaandschop van Oost-Stellingwarf maeken. Tiedens die routes stik ie an op alderhaande plakken daor wat biezunders te zien en te beleven is. En aj’ je smartphone dan veur een QR-kode holen, kriej’ een verhaeltien over dat plak te heuren. Et warkt dus krek as een audiotour in een museum. Ie kun kiezen in welke tael aj’ die verhaelen heuren willen: Stellingwarfs of Nederlaans. Ik vertelle de Stellingwarver verhaelties. En dat hewwe vandemorgen dus allemaole opneumen. We bin een goeie aanderhalf ure an de gang west en ik hebbe mar vier keer een verspreking maekt. Et gong dus prima, mar ik hadde thuus ok ommeraek rippeteerd en nog es rippeteerd.
Vandemiddag he’k naor de Fleurije in Hooltpae west om plaanten en plaanties te kopen veur in de bakken om huus henne en veur op et karkhof. Ik hebbe alles ok drekt mar te plak brocht. Dat alles is now klaor en et liekt prachtig om huus henne en op et karkhof ok.