Fietsen

Ik hebbe gisteraovend heerlik vertellen kund in Ni’jehoorn. Wat mooi daj’ iederiene weer een haand geven kunnen! Wat vuult dat weer vertrouwd. Wat mooi ok dat Lie van Hendrik Mattens d’r was. Zodoende konnen we gezellig in et Stellingwarfs over Ni’jhooltpae van vroeger praoten!
Vandemorgen betied bin ‘k al henne te stemmen west. Et was de 53ste keer da’k stemmen moch. De eerste keer was in 1970 veur de Staoten. Ik hebbe 51 keer zels stemd en ik hebbe mien moeder in 1981 (Kaemer) en 1982 (Staoten) een volmacht geven. Die het doe dus veur mi’j stemd, want ik was beide keren mit Haarm op vekaansie. Nooit is mien stemme dus ok mar iene keer verleuren gaon. Dat mag ok niet. We moe’n d’r bliede omme wezen dawwe in een demekraosie leven en dawwe in vri’jhied stemmen kunnen en meugen. Kiek mar om je henne in de wereld! Maek daor dan ok gebruuk van! In de loop van de morgen biwwe hier op ‘e fiets stapt en hewwe een lekkere fietstocht van 36 kilemeter maekt. De eerste van dit jaor. Et zol hier zestien graoden wodden. Now, ik betwiefele as dat et wodden is. Ik daenk et niet. Op ‘e ruumte was de wiend best nog wel wat schraol. Mar et was heerlik. We bin deur de Mildamster Poolder fietst en doe over et fietspad bi’j de Kuunder langes naor Et Vene. Vervolgens naor Oranjewoold. Daor hewwe in een slim bekend hotel in de bossen waarm drinken en een hiempien oranjegebak had. Via mooie fietspaeden kwammen we in Ni’jehoorn uut. Daor wa’k gisteraovend dus ok! En doe deur de lanen naor de sluus bi’j Ooldehoorn en doe op huus an. Om vier ure vandemiddag hewwe lekker eten in resteraant ’t Koepelbos daor we in de coronatied zo vaeke naor de snackbar west hebben. Heerlike petat en schnitzel! Ik vule me now as ha’k de hiele dag op et ies west.