Fietsen in en om Veenhuzen

Et was vandaege weer prachtig fietsweer, de temperetuur leup vandemiddag op naor 20 graoden. We hebben de fietsen vandemorgen aachter op ‘e auto sjord en bin doe naor et Gevangenismuseum in Veenhuzen reden. Daor weren W.A. en Máxima eregister nog. Et ienige verschil was dat d’r veur oons gien belangstelling was. We hebben een mooie fietstocht van 40 kilemeter maekt. We bin eerst over Westervelde kommen, daor woonde de Stellingwarver schriever en dichter Jouk (Martinus Bakker) indertied. Zien eerste Stellingwarver boek Een haandvol speulgoed is bi’j mi’j thuus in Ni’jhooltpae prissenteerd. Now hewwe et over et begin van de zeuventiger jaoren van de veurige ieuw. Meer as vuuftig jaor leden… Deur een prachtig netuurgebied kwammen we weer in Veenhuzen en doe biwwe naor Bovensmilde fietst en vervolgens een mooie tippe deur et Fochtelder Vene. Prachtig is et daor toch! We hebben om vier ure eten in Family in Appelsche. Ik hebbe een lekkerbekkien had. Doe we thuuskwammen ston d’r een emmer mit stoofperen op ‘e regentonne. Dat is plezierig thuuskommen! Hieronder een foto van vandaege. Dit is et Gevangenismuseum in Veenhuzen.