Fietsen in de kotte broek

Wat was et prachtig weer vandaege. Een uutgezochte dag veur een fietstocht van 42 kilemeter in de kotte broek. Nooit eerder hawwe om half april al twie fietstochten maekt. We hebben vandemorgen de fietsen aachter op ‘e auto zet en bin naor Appelsche reden. Van daor hewwe naor Diever fietst, een aandere route langes as die we eerder altied deden. Niet over Vledder, mar wel over Oolde Willem. Op et terras van dörpsresteraant De Lange hewwe een bakkien drinken en een gebakkien had. En doe biwwe over een nog weer aandere route weeromme naor Appelsche fiest. Een prachtige route dwas deur de bossen. We hebben gien wolf zien, mar een wolf het oons lichtkaans wel zien. In Appelsche hewwe et dörp nog even rondfietst. We kwammen ok bi’j de witte villa langes van de direkteur van de Stellingwarver Schrieversronte. We hebben heerlik in de zunne een twaelfuurtien had op et terras van Family an de Boerestreek. Et was daor 25 graoden! Zat biwwe daor weer op ‘e fietst stapt. Et was intied bewolkt wodden en d’r vullen een peer spatters. We hadden de auto op et grote parkeerterrein bi’j et infermaosiepunt van Staotsbosbeheer staon. D’r zol regen, onweer en hadde wiend kommen, mar dat is niks wodden. Tot now an toe temeensen niet. Hieronder twie foto’s die ‘k in Diever maekt hebbe. Boven: de mooie karke, die aanders altied aachter et blad verburgen zit. Onder: et hunebed van Diever.