Fietsen in de Aachterhoek

Et was vandemorgen niet echt lekker rieden naor Jan en Diana in Aalten. Op plakken was et slimme mistig en dan was d’r inienend de zunne weer. Ik mos de hieltied wisselen van zunnebrille en gewone brille. Bi’j Stienwiek ontdekte ‘k dat de batteri’je van mien tillefoon leeg was. Omda’k dat ding nooit bruke, daenk ik d’r nog wel es niet an om him op te laeden. Now ja, gelokkig da’k him vandaege niet neudig hadde. Hi’j zit now an de stroom. Ik was om kwat veur elven in Aalten. We hebben eerst lekker wat bi’jpraot op et terras aachter heur huus en we hebben daor ok sop en bolle had. En doe hewwe een fietstocht van goed veertig kilemeter maekt. Meerst in et schaad van bomen. Wat is et daor toch prachtig! Ik ree op percies zoe’n fiets a’k zels ok hebbe. We bin deur de buurtschoppen en dörpen om Aalten hennefietst: Lintelo, Varsseveld, Sinderen. Op et terras van de grote boerderi’je mit speultuun Groot Nibbelink hewwe wat drinken had mit een lekker gebakkien d’r bi’j. Et was Eupen Monementedag, dat we hebben ok de meule De Nieuwe Molen in Sinderen bekeken. De dieselmoter warkte dat zowat dee. We bin over prachtige oolde karkepaeden fietst. Naodawwe even bi’j Jan en Diana thuus west hebben, biwwe doe op ‘e fiets naor brasserie ’t Grachthuys in de boekestad Bredevoort gaon. Et plak daor Hendrikje Stoffels wegkwam. D’r staot now een staandbeeld van heur. In Bredevoort hewwe heerlik waarm eten had op et terras van de brasserie en doe biwwe weerommefietst. In Aalten he’k nog een bakkien thee had en doe bin ‘k daor om kwat over zeuven weer in de auto stapt nao een mooie en gezellige dag. Hieronder een foto die deur een serveerster van ’t Grachthuys maekt is. We zullen krek beginnen te eten.