Fietsen bi’j kestelen langes

Ik slaope hier wel lekker, want ik hebbe mien eigen heufdkussen mit. In hotels en vekaansiehuzen hebben ze van die sloppe dingen, dat is me niks. Vandaege kon dan de kotte broek weer an en de zunnebrille op. Et bleef de hiele dag dreuge. We hebben een prachtige fietstocht maekt bi’j acht kestelen langes. De ooldste fietsroute van Nederlaand. Jelle en ik hebben de Vordense Achtkesteletocht in begin augustus 1965 ok fietst, tegere mit Jan en Thomas. Doe as jongkerels van 18 en 19 jaor en now as oolder woddende mannen nog een keer. Oons verstaand is trouwens nog lieke helder. Wat een prachtige tocht is dat toch deur et wondermooie Aachterhoekse laand. Over fietspaeden, zaandwegen, deur lappen bos… en dus bi’j acht kestelen langes. Et bekendse is vanzels kesteel De Wildenborgh daor de dichter A.C.W. Staring indertied woonde. Niet alle kestelen konnen we vlakbi’j kommen. In De Bosloods bi’j kesteel Vorden hewwe in de zunne en op et terras wat dronken en een lekkere tosti behaffeld. In Vorden kwammen we bi’j een supermark langes, dat daor hewwe wat bosschoppen daon. En ja, we hebben ok nog een stokkien van de kaemerdebatten in Den Haag zien. Wat een vreselike en bcschaemende vertoning. Hieronder twie foto’s die ‘k vandaege maekt hebbe. Boven: kesteel Vorden en daor onder de aachterkaant van kesteel Hackfort.