Fietsen (9)

Om et middagure henne kree ‘k vandaege femiliebezuuk: Ria, Mariska, Dennis en Isabelle uut Papendrecht. Ze zitten een dag of wat naor anleiding van Ria heur verjaordag in een vekaansiehusien in Else. En dat was dus een mooie gelegenhied en kom even langes. We hebben buten in de tuun zeten om bi’j te praoten en ik hebbe zorgd veur koffie, thee, doempies en morgpiepies. Ria he’k vleden jaor nog zien doe ze mit vrunden in een zoemerhusien in Noordwoolde-Zuud zat. Doe he’k daor bi’j heur eten. Mar de rest ha’k vanwege corona in drie jaor tied niet zien. Et was hiel genoeglik. Morgen gaon ze weer naor et drokke en wilde westen toe. Nao de vesite bin ‘k op ‘e fiets stapt en he’k 30 kilemeter fietst. Ik bin eerst over De Hoeve naor Noordwoolde gaon. Daor he’k in theeschinkeri’je De Buytenplaets an de Dwasvaortweg een kanne darjeeling en een croque madame had. Vervolgens bin ‘k over De Oosterstreek, Buil en Berkoop weer op huus an gaon. Op ‘e Oosterstreek raekte ‘k nog van de fiets. Daor trof ik ex-kollega Jan uut Noordwoolde. Die was uut fietsen mit de hond in een körf aachter op ‘e pakkiesdreger. De hond vun dat mooi, mar ik daenke niet dat poes Marja zoks mooi vienen zol. We hebben ofpraot dawwe mekeer awwe honderd wodden bellen zullen. En ja, belofte maekt schuld.