Fietsen

We hebben gister een prachtige aovend had in de biebeltheek van Wolvege. Arjan Sterken vertelde utermaote boeiend over volksverhaelen en veural over volksverhaelen in de Stellingwarven: saegen, sprokies, legenden… Zit d’r Friese of Nedersaksische invloed in de Stellingwarver volksverhaelen? En dan de volksverhaelen van vandaege-de-dag: ufo’s, Nessie in Loch Nes, komplotverhaelen…

Vandaege hewwe een heerlike fietstocht van 45 kilemeter maekt. De temperetuur steeg naor 19 graoden. Heerlik! We hebben de fietsen aachter op ‘e auto zet en bin naor de Driewegsluus reden. Daor biwwe begonnen te fietsen. Ik hebbe veur de eerste keer een fietshelm op had. Et fietst vule lekkerder zonder zoe’n ding, vien ik. Mar ja, ie wo’n oolder, straampeliger en klongeliger… We bin over de Lendediek naor Ossenziel reden en doe et fietspad bi’j et waeter langes mit al die broggies naor Kaelenbarg. We fietsen die schitterende route ien of twie keer in et jaor. In Kaelenbarg hewwe op et terras van ’t Lokaal an et waeter een bakkien drinken had en een hiempien Blokzielder Brokke. Vervolgens biwwe over Nederlaand en Wetering naor Ooldemark reden en doe hewwe nog een slinger maekt en bin bi’j et Wiede van de Lende langes weer naor de Driewegsluus gaon. Daor hewwe drinken en een twaelfuurtien had. Wat is et daor vule duurder as in De Stoof… D’r zat een man mit een grote krulderige hond die van Beer hiette. Et akkedeerde drekt best tussen Beer en oons. Dat de man vreug awwe even op him passen wollen. Dat wollen we wel. As de man niet weerommekommen was ha’k vannaacht een kalf van een hond en een poes op et voetenaende van et bedde liggen had. Nao et eten hewwe nog een rontien deur de Rottige Miente en bi’j de Scheene langes fietst. Wat een mooie dag! Hieronder twie foto’s die ‘k vandaege maekt hebbe. Boven: Kaelenbarg vanof de brogge. Onder: De prachtige Weerribben.