Fietsen

Ik hebbe vri’jwat last van de kni’jen, mar kan nog wel fietsen. Al bin ik nao een fietstocht wel vule vermuuider as aanders. Vandaege was et uutgelezen fietsweer. Ik hebbe een tocht van percies 40 kilemeter maekt. Bi’j de Lende langes bin ‘k naor de Driewegsluus fietst en van daor naor Ooldemark. Op et terras van Family he’k wat drinken en een twaelfuurtien had. Doe bin ‘k in de richting van Blesdieke gaon en op ‘e greens van Ooldemark en Blesdieke bin ‘k weer naor de Sas fietst en doe naor Wolvege. Daor he’k wat bosschoppen daon. Onderwegens bluuiden brem en meidoorn en in baarms en wallen de mooie hoornbloemen. Zo mooi allemaole! Ik zag nog hiel wat vlaggen en wimpels. Die betreffende meensken hebben ze gister vergeten in te haelen of ze vlaggen twie daegen aachter mekeer, omdat de keuning eerst vandaege jaorig is. Ik hebbe allienig gister vlagd. Ik zat trouwens op donderdagaovend 27 april 1967 mit Gert in de bioskoop van de Generaol Spoorkezerne in Ermelo doe de film onderbreuken wodde mit et bericht dat Beatrix et leven schonken hadde an een zeune. Dat betekende dawwe eredaegs vri’j weren. Ik wete nog dawwe in de zunne aachter et Stafgebouw, tussen de dennebomen, laggen te niksdoen. We mochten eerst aovens mit weekaendeverlof. Wat is dat al lange leden… Ik hebbe zokrek nog een ontbijtkoeke bakt en die is heerlik wodden. Hieronder nog een foto die ‘k vandaege maekt hebbe. Dit is et Wiede van de Lende.