Fietsen

Ik hebbe now goed een jaor een smartphone en Whatsapp. Ik appe zo now en dan mit ongeveer twintig verschillende meensken. Mar de eerste het now angeven dat die Whatsapp opzegt en overgaot naor Signal. Ze wil die Amerikaanse techmiljardairs en loopjongen van Trump niet steunen. Een veurnemen om over nao te daenken en te overwegen. Ik kieke et nog even an, wil bepaolde kontakten op dit stuit nog niet graeg kwiet.

Ik bin vandaege begonnen en rippeteer de verhaelen veur de optredens van ankem weke. Ik zal dan mar liefst drie keer de diek uut te vertellen. Et is even krek as vroeger. Ik zal naor Workum, Steggerde en Liwwadden.

Et was vandaege prachtig weer, dat ik bin op ‘e fiets naor Wolvege west om wat bosschoppies te doen. Ik kwam Frits en Karin van de vroegere boekwinkel Zwikstra tegen. Die maekten heur daegelikse lange kuier. We hebben genoeglik even praot. Wat misse ik Zwikstra altied nog. Wat is Wolvege toch zonder goeie boekwinkel… Weeromme naor huus bin ‘k bi’j de Lende langesfietst en hebbe onderstaonde foto maekt.