Fietsen

Gistermorgen zat d’r een man naost me in de Grutte Tsjerke van Sloten die een geweldige stemme hadde. Hi’j zong de lieden prachtig en veural vol overtuging mit. Ik hebbe eerst niet mitzongen, tegen zovule kwaliteit kan ik toch niet op. Mar et laeste lied van de dienst he’k juust wel volop mitzongen. Dat was Ferry zien lievelingslied. Lied 769: Eens, als de bazuinen klinken. Et grote Toeval mit een heufdletter wil dat ik dat lied bruukt hebbe in mien verhael Postzegels in mien laeste verhaelebundel Naozoemerlaand. Et verhael over Machiel en Els. Doe ik dat verhael schreef he’k op internet meerdere keren naor dat lied luusterd. Ik kende de wieze dus en kon et zo mitzingen. En dat he’k dus daon. Veur Ferry en et Toeval.
Eens, als de bazuinen klinken,
uit de hoogte, links en rechts,
duizend stemmen ons omringen…

Vandaege he’k een heerlike fietstocht van 41 kilemeter maekt. Et kan now en morgen nog! Ik bin bi’j de Kuunder langes naor de sluus onder Iegypte fietst en doe over Berkoop, Buil en De Oosterstreek naor de theetuun bi’j De Buytenplaets an de Dwasvaortweg. Daor he’k een pot darjeeling thee had en een croque madame. Et maegien dat vreug wat a’k hebben wol, was slimme in de bonen. Doe ‘k zee wat a’k hebben wol, vreug ze wat mien vrouw hebben wol. Ik hebbe es om me hennekeken, aachter de polleboel en zo, mar d’r was nargens een vrouw te bekennen. Over Noordwoolde en Berkoop bin ‘k weer op huus an gaon.

Douwe en Romkje bin op vekaansie in de Fraanse Chablis. Van daor stuurden ze me verschillende foto’s toe. Hieronder ien van die foto’s. Et zicht d’r daor hiel aanders uut as hier in Ni’jhooltpae.