Fietsen
Plaetst op 30 april 2023.
Vandemorgen he’k teksten rippeteerd. Ik hebbe verhaelen rippeteerd veur et optreden van de kommende deensdagmorgen in Berkoop en ik zal morgenvroeg een hiele lappe tekst veurlezen in de radiostudio van Odrie in Oosterwoolde. Zoks moej’ meerdere keren flink rippeteren, aanders loop ie in de studio de hieltied vaaste, blief ie stoeken, en dat mag vanzels niet.
Eindelik he’k es weer een tippien fietst! Ik hadde in een half jaor niet fietst, mar et is now eindelik mooi fietsweer. Nog gien kotte-broeke-weer, mar ik hope dat dat ok gauw et geval wezen zal. Ik bin vandemiddag over et witte broggien en bi’j de Lende langes naor Wolvege fietst. Lanen vol peerde- en pinksterbloemen en in de baarms hoornbloemen. Et kan niet mooier! Wiethoevule meensken reupen van goeie naor me. Ik hebbe almar van goeie weerommereupen, mar hadde meerst gien flauw idee wie et weren. Doe ‘k een foto maeken wol, stopte d’r een vrouw bi’j me die ‘k ok niet kende. Ze vertelde dat ze in Ni’jhooltwoolde woonde en een vrundinne van Wiesje Nijholt was. Die ken ik dan weer wel. Bi’j de ieskarre van Homma, bi’j et hoge broggien, zat Henk uut Ni’jhooltpae en over dat hoge broggien fietsten Vrouwkje en Eppie even laeter bi’j me langes. In Wolvege he’k naor de supermark west en mit de fietstassen vol bosschoppen en ok nog een tasse an et stuur bin ‘k bi’j de Scheene langes weer naor huus fietst. Et was een heerlik mar nog bescheiden tochien van 23 kilemeter. Hieronder een foto die ‘k vandemiddag maekt hebbe. Wolkens spiegelen heur in et waeter en gele kano’s veren op et waeter. En de Lende stroomt wieder.
Eindelik he’k es weer een tippien fietst! Ik hadde in een half jaor niet fietst, mar et is now eindelik mooi fietsweer. Nog gien kotte-broeke-weer, mar ik hope dat dat ok gauw et geval wezen zal. Ik bin vandemiddag over et witte broggien en bi’j de Lende langes naor Wolvege fietst. Lanen vol peerde- en pinksterbloemen en in de baarms hoornbloemen. Et kan niet mooier! Wiethoevule meensken reupen van goeie naor me. Ik hebbe almar van goeie weerommereupen, mar hadde meerst gien flauw idee wie et weren. Doe ‘k een foto maeken wol, stopte d’r een vrouw bi’j me die ‘k ok niet kende. Ze vertelde dat ze in Ni’jhooltwoolde woonde en een vrundinne van Wiesje Nijholt was. Die ken ik dan weer wel. Bi’j de ieskarre van Homma, bi’j et hoge broggien, zat Henk uut Ni’jhooltpae en over dat hoge broggien fietsten Vrouwkje en Eppie even laeter bi’j me langes. In Wolvege he’k naor de supermark west en mit de fietstassen vol bosschoppen en ok nog een tasse an et stuur bin ‘k bi’j de Scheene langes weer naor huus fietst. Et was een heerlik mar nog bescheiden tochien van 23 kilemeter. Hieronder een foto die ‘k vandemiddag maekt hebbe. Wolkens spiegelen heur in et waeter en gele kano’s veren op et waeter. En de Lende stroomt wieder.