Fietsen (19)

We hadden vandaege nog best wel mit de boot et waeter op kund, mar we hadden d’r niet meer op rekend dat et zok mooi weer wodden zol. Dat alderhaande boel is al uut de boot weg en hi’j gaot disse weke nog uut et waeter. Vandaor dawwe een heerlike fietstocht maekt hebben. Wat was et prachtig fietsweer. Et is een tocht van 57 kilemeter wodden, meer as dawwe eerst zollen. Mar ja, aj’ dan an de gang binnen en et is zok mooi weer… We bin bi’j de Lende langes naor de Driewegsluus fietst en doe over de Lendediek naor Ossenziel. Vervolgens over dat prachtige fietspad mit al die broggies bi’j et waeter langes naor Kaelenbarg. Daor hewwe op et terras van Hotel Het Rietershuys wat eten en drinken had. Allebeide een Weerribben trio. Dat is een koppien tomatesop, een plakkien bolle mit een spiegelei en een plakkien bolle mit een kroket. Overal zatten de terrassen vol. Aj’ dat zo zien zoj’ niet zeggen dawwe in een krisis zitten en dat de meensken haost gien centen meer te besteden hebben. D’r lag een dikke rooie katte op et terras en die wodde deur alderhaande meensken aaid. Netuurlik ok deur mi’j. In et vroege veurjaor hewwe disse fietstocht ok maekt, doe zatten we nog in de coronatied en weren d’r mar kwaolik terrassen los. Mar disse dus wel, dat we hebben daor doe ok zeten. Alhoewel we doe eerst mit de auto naor de Driewegsluus reden binnen en daor eerst begonnen binnen te fietsen. Over een mooi fietspad biwwe naor Ooldemark fietst en doe over Blesdieke en De Blesse op huus an. Hieronder een foto van vandemiddag van et mooie Kaelenbarg.