Fietsen (14)

Vandaege het Douwe hier west. We fietsen elk jaor hier een keer en een keer bi’j him in Veenwoolden. Douwe krigt hier de fiets van Anke altied mit. Hi’j was hier vandemorgen om half elf. Ik hebbe him eerst koffie en zelsbakte kokeskoeke veurzet en doe bin we een ure laeter op pad gaon veur een tochien van 45 kilemeter. Bi’j de Kuunder langes naor de sluus bi’j Ni’jberkoop. We zollen binnendeur naor Buil en De Oosterstreek, mar we konnen de weg naor Bekhof niet op. Ze bin mit de parrellelweg naost de Stellingenweg an ’t wark. Dat we bin naor Berkoop fietst en daor hewwe op et terras van hotel Lunia luncht. Ik hebbe brood mit rookte zalm had. Vervolgens bin we naor Noordwoolde fietst. Daor hewwe et karkhof bekeken. Wat ligt dat d’r daor netties bi’j! Daor kun een protte dörpen een veurbeeld an nemen. Nao et karkhof bin we tot Noordwoolde-Zuud fietst, doe een stokkien deur de bos en bi’j de Spoekepoele langes naor Vinkege. Daor bin we ok op et karkhof west en we hebben bekeken wat veur mooie torenspits d’r now op ‘e karke staot. Prachtig! In 1969 is de oolde torenspits d’r ofhaeld omdat et ding of was. D’r is doe een oerlillik zaedeldaktorentien van maekt. Mar doe wodde ontdekt dat d’r argens een torentien te bezetten was. Et komt van et kattelieke manludeziekenhuus Joannes de Deo in Haarlem. Daor is et ofkommen en bi’j een annemer in Velserbroek belaand. En now… staot et op et karkien van Vinkege. Wat mooi! Zie de foto hieronder die ‘k vandemiddag maekt hebbe. Over De Hoeve bin we naor huus fietst. We hebben vanaovend waarm eten had op et terras van Van der Valk in Wolvege. En doe was die mooie dag al weer veurbi’j…