Fietsdaegen

Gisteraovend moch ik in Surhuustervene vertellen veur de leden van Vrouwen van Nu. Et was hiel genoeglik. Van de 59 leden kwammen d’r 50 naor mi’j te luusteren. Dat is toch niet gek! Doe ‘k thuuskwam ha’k d’r drie verteldaegen opzitten en ik nam me veur dat d’r drie fietsdaegen aachteran kommen mossen. Et is now nog prachtig naozoemerweer en dat is ankem weke veurbi’j. Ik bin vandemorgen eerst naor de biebeltheek in Wolvege west en doe bin ‘k van daor bi’j de Lende langes naor de Driewegsluus fietst en doe naor Ooldemark. Op et terras van Family he’k een bakkien drinken en een twaelfuurtien had. Ik bin doe naor Paosloo fietst en vervolgens, veur een pat deur de bos, naor Willemsoord. Wat een mooie route. Wat reuk et al haastig in de bos en wat valen d’r al een protte ekkels van de bomen. Bi’j mi’j naost huus ok. Over De Blesse en Peperge bin ‘k doe weer bi’j de Lende langes naor huus fietst. Et was een mooie tocht van 47 kilemeter. Wodt morgen vervolgd.

Douwe en Romkje zitten of zatten in Zeeuws-Vlaanderen. Ze stuurden me een kaorte vanuut et Permeke Museum in et Belgische Jabbeke. Op ‘e kaorte staot et schilderi’je De jonge visser van Constant Permeke uut 1924.