Fiets

Plaetst op 14 april 2023.

Mien elektrische fiets is vandaege vuuf jaor wodden. Ik hebbe d’r in die vuuf jaor 10.184 kilemeter op fietst. Per jaor: 2284, 1795, 2417, 1908 en 1780. Et laeste jaor he’k dus et minste tal kilemeters reden. Dat moet aenlik al weer wat meer wodden…

Ik hebbe een aorig boek lezen en bekeken: Koninklijke gerechten voor (keuken)prinsen & prinsessen van Dorine de Vos en Michael van der Struis. Ze hebben naogaon wat tal van beroemde meensken uut de geschiedenis lekker vunnen. D’r staot van alles over die meensken in et boek en ok de recepten van heur lievelingseten. Misschien da’k nog wel es zoe’n oold recept uutperberen gao. Een peer veurbeelden: Hendrik VIII van Engelaand (1491-1547) die zes vrouwluden versleten het, hul van amandel-citroentaart. Zien dochter Elisabeth I (1533-1603) hul van knienevleis. Oonze eigen Amalia van Solms (1602-1675) die trouwd was mit stadhoolder Frederik Hendrik was gek op scharrelkapoen (maïskiepe). Winston Churchill (1874-1965) koj’ wel wakker maeken veur soufflé. Keuninginne Victoria (1819-1901) hul van frituurde pasteigies mit garnaleragout. George Washington (1732-1792) van kalkoen mit bolle, cranberry’s en pompoen. En Admiraol Horatio Nelson (1750-1805) leut him graeg lamskoteletties veurzetten mit siepelpuree en parmezaanse kezesaus. Ik stao d’r niet in, mar ik bin gek op alderhaande stamppotten!